ЕКСКЛУЗИВНО | Истражување на „Брима“: Заев сѐ уште најпопуларен политичар
Редовниот политички барометар на агенцијата „Брима“ за политичките ставови на населението во Република Северна Македонија во пресрет на локалните избори во државата е теренско истражување, спроведено во периодот од 27 август до 9 септември годинава на национално репрезентативен примерок (анкетата е направена според методот лице-в-лице, во домот на испитаникот), со запазаување на сите демографски карактеристики на популација од 18+ години во државата, во која се опфатени 1.201 испитаници. Резултатите се со маргина на грешка од +/- 2,8%.
И во оваа анкета – и покрај, генерално, ниските рејтинзи на политичарите – најпопуларниот политички лидер во Македонија е Зоран Заев, кој со своите 11,8% од поддршката на анкетираните убедливо води пред лидерот на опозицијата Христијан Мицкоски (7%). Меѓу етничките албански политичари, пак, „трката“ е нешто потесна, иако Ахмети со 5,9% и Биљал Касами со 4,4% го предводат „дуетот“ во власта, пред опозиционерите Зијадин Села (4,1%) и Африм Гаши (0,4%).
Општо земено, сите наши политички лидери ја немаат моќта на поопшто обединување на граѓанството.
На пример, за „водечкиот“ Заев „многу благонаклон“ и „донекаде благонаклон“ став искажале 13,6% и 17,8% од испитаниците, додека за „донекаде благонаклон“ и „многу неблагонаклон“ став се определиле 18,7% и 46,9% анкетирани. За споредба, на Христијан Мицкоски „многу благонаклоно“ гледаат 8,3% и „донекаде благонаклоно“ 15,8% од анкетираните, а комбинираниот скор на „многу“ и „донекаде“ неблагонаклонетост надминува 71% од испитаниците. Во случајот на албанските лидери таа дискрепанца е уште поголема.
Кога станува збор за натпартиската функција на претседателот Пендаровски, за него расположението е релативно поврамнотежено: тој одредена благонаклонетост предизвикува кај 40% од анкетираните, наспроти 56,5% неблагонаклонетост. Тоа е многу слично со комбинираниот скор на Венко Филипче, на пример, за кого благонаклон став изразиле речиси 41% од анкетираните, а скорот кај оние кои неблагонаклоно гледаат на него и неговата работа е нешто над 56%.
Погледнете ги и останатите резултати од истражувањето на „Брима“:
ЕКСКЛУЗИВНО | Истражување на „Брима“: Кој има најмногу шанси на локалните избори
ЕКСКЛУЗИВНО | Истражување на „Брима“: Како ќе се гласа ако утре има парламентарни избори
ЕКСКЛУЗИВНО | Истражување на „Брима“: Што ги мачи граѓаните?