Македонскиот женски кошаркарски клуб Бадел 1862 имаше одлично прво полувреме против фаворитот од Подгорица (Црна Гора), но немаше сили за второто и на крајот претрпе втор пораз од Будуќност (59:67).

Дефинитивно и најдобра прва четвртина во која на големиот фаворит му покажаа дека со право се составен дел на ова високо друштво, најсилното регионално натпреварување.

Реализираа двоцифрена предност (24:14) домашните кошаркарки во првите 10 минути. Во оние наредните не само што успеаја да ја задржат, туку ја поместија на уште повисоки (44:33).

Но, по одморот, на теренот во салата „Независна Македонија“ како да беа сосема други екипи. Гостинките направија голем пресврт, во третиот период на „баделки“ им дозволија да реализираат само шест, дадоа 21 поен, доволно за преземање на водството (54:50).

По серијата од 7:1, Будуќност „побегна“ на двоцифрени 61:51 по три минути игра од последната четвртина. Тоа се покажа и како недостижно за домашниот тим во кој Стојановска и Кметовска имаа по 18 поени, но за комплетно изненадување против лидерот, недостасуваше поголема „логистика“ од останатите.

Веќе на 9 феврури, Бадел 1862 ќе игра уште еден натпревар на домашен терен. Во Скопје доаѓа екипата на Војводина 021 од Нови Сад (Србија). На табелата Будуќност е второпласиран со 21 бод, колку што има и водечкиот состав на Цинкарна Целје, додека Бадел 1862 е на последното осмо место со 11 бодови.