Е. Пелистер се засили и со Тунижанецот Суси
Македонскиот вицешампион РК Еурофарм Пелистер се засили со тунискиот репрезентативец Мохамед Суси кој потпиша едногодишен договор, со опција да се продолжи на уште една.
Трансферот е официјализиран откако ракометарот денеска пристигна во Македонија и ги мина задолжителните медицински прегледи.
Долгогодишниот репрезентативец на Тунис доаѓа во Битола од Франција. Минатата сезона го носеше дресот на Трембле, а претходно три сезони играше во Лигата на шампионите за Монпелје. додека во Тунис настапуваше за Бени Киар и Клуб Африкан.
Со Монпелје стана европски првак во 2018 година, а следната сезона со истата екипа го освои и Суперкупот на Франција.
Суси има преку сто настапи за туниската репрезентација, настапи на три Светски првенства и еден олимписки ракометен турнир. Со својата селекција го освои првенството на Африка во Габон во 2018 година, а две години подоцна беше сребрен на домашен терен. Со Тунис има и сребро на Медитеранските игри во Тарагона во 2018 година.