Е. Пелистер не се предава превреме: На победа против Мешков
Ракометарите на Еурофарм Пелистер викендов ги очекува реванш натпреварот од четвртфиналето во СЕХА Лигата против Мешков Брест. Првиот натпревар во Битола заврши со триумф на Мешков од 27:31, но поразот не ги обесхрабрува битолчани.
– Загубивме, но не со голема разлика за да се откажеме. Напорно работевме неделава, нема што да загубиме, треба да се бориме и да се надигруваме. Можеме да стигнеме до позитивен резултат. Мешков Брест е квалитетен тим. Сепак се четвртфиналисти на Лигата на шампионите. Имаат играчи од калибарот на Скубе, Кашпарек, Ваилипау. Имаат квалитетни индивидуалци, но не значи дека ние немаме доста квалитетни играчи и најважно ќе биде кој повеќе ќе сака да победи – вели голманот на Е. Пелистер, Марко Кизиќ.
Ракометарите се свесни дека не ја прикажаа посакуваната игра во првиот натпревар и се надеваат дека „ќе се извадат“ на реваншот.
– На натпреварот во Битола не ја покажавме правата слика, игравме под нашите можности и сигурно можеме подобро. Зе надевам дека во Белорусија ќе покажеме подобро лице. Не се откажуваме, четири разлика не се многу, во спортот сè е можно. Одиме на победа во Брест. Сигурно дека двете екипи добро се подготвија за првиот натпревар, но тоа не беше наш ден. Сите ние како екипа потфрливме, но одиме во Белорусија да се покажеме во подобро издание. Со секој тренинг, со секој натпревар се подготвуваме за тоа што ни следи. Сите добро знаеме што е пред нас. Со секој тренинг напредуваме и може да биде само подобро – вели Јосип Божиќ Павлетиќ.
Реванш натпреварот ќе се игра во недела со почеток од 16 часот.