Фудбалскиот клуб Ренџерс се наоѓа во сериозна криза и сè уште не успева да пронајде нов тренер откако се раздели со Расел Мартин по катастрофалниот старт на сезоната. Последниот кој ја одбил понудата е Стивен Џерард.

Поранешниот англиски репрезентативец и фудбалер на Ливерпул смета дека моментално не е вистинското време за враќање во Глазгов, каде што претходно беше шеф на стручниот штаб од 2018 до 2021 година.

Џерард имал состанок со раководството на Ренџерс, разговорите минале во позитивна атмосфера, но тој сепак решил да ја одбие понудата, главно поради нестабилната состојба во клубот. Иако не ја исклучува можноста во иднина повторно да седне на клупата на шкотскиот гигант, засега ќе чека нова прилика.

Ренџерс ја започна сезоната ужасно слабо – по седум кола има осум бодови и се наоѓа на осмото место во шкотскиот шампионат, додека во Лигата на Европа по две одиграни средби нема ниту еден бод.