Партизан остана без шанса да ја освои деветтата титула во АБА лигата, откако загуби од Дубаи, кој со победата од 83:81 во „Белградска арена“ ја доби финалната серија со 3:1.

Со овој пораз, „црно-белите“ ја завршуваат сезоната без ниту еден трофеј, првпат по 2021 година, иако беа во конкуренција за четири различни титули.

Тимот на Дубаи, предводен од словенечкиот селектор Александар Секулиќ, одлично го отвори натпреварот и уште на стартот создаде предност од 11:2, што го натера тренерот на Партизан, Шпанецот Жоан Пењароја, да побара тајм-аут.

Паузата донесе реакција кај домашниот состав, кој постепено се врати во игра и успеа да ја намали негативата. Сепак, Партизан тешко доаѓаше до водство и само двапати накратко беше во предност и тоа со минимална разлика од еден поен, која не успеа подолго да ја задржи.

Дубаи во продолжението ја зачува присебноста и на крајот стигна до историски успех, освојувајќи ја титулата во регионалното натпреварување. Мифунду Кабенгеле со 14 поени беше прво име кај Дубаи, додека кај Партизан по 16 поени постигнаа Исак Бонга и Стерлинг Браун.