Државната каса се полни како и пред кризата
Наплатата на буџетските приходите се враќа на предкризниот период и се очекува стабилизација на економија, оцени на прес конференцијата министерот за финансии Фатмир Бесими.
– Приходите во буџетот од почетокот на годинава, заклучно со февруари, се на речиси исто ниво како лани пред да почне криза. Наплатата на даноците изнесува 17,8 милијарди денари и е на исто ниво како и претходната година, додека наплатата на придонесите од 10,4 милијарди денари е за 1,7 проценти повеќе од лани. Реализацијата на расходите е со планирана динамика, исто како и буџетскиот дефицит – рече Бесими.
Тој посебно го анализираше и февруари забележувајќи дека во овој месец има раст на наплата на даноците за 3,5 проценти во однос на лани.
– Кај данокот на добивка имаме подобра наплата за 27,7 проценти во однос на истиот месец лани, а кај данокот на додадена вредност растот е 9,7 проценти. Кај придонесите растот е 4,3 проценти – рече Бесими.