Скопската издавачка куќа „ПМГ Џез“ го издаде своето 58-мо албумско остварување. Септетот „Солидариташ оркестар“ го претстави своето првенче – „Адат Фоја“ (Addāt Fōyya).

Оваа меѓународна музичка формација е предводена од Дени Омерагиќ и Нинослав Спировски – двете веројатно најмаркантни фигури на македонскиот креативен џез, најпознати како коавтори на триото „Светлост“, како и „Одрон ритуал оркестра“, проекти кои доживеаја повеќе меѓународни признанија во периодот од 2019 до 2024 година.

На овој албум, снимен во март годинава во Будимпешта, покрај Омерагиќ и Спировски (кои се јавуваат како изведувачи и автори на музиката), се запишани и изведбите на двајца интернационалци базирани во Унгарија – Кристофер Кокс (тромбон, САД) и Давид Карла (саксофон и бас кларинет, Литванија / Австралија), како и Виктор Капуши (саксофон), Петер Ајтаи (контрабас) и Атила Ѓарфаш (тапани) – тројца претставници на вибрантната џез-сцена во унгарската метропола.

Албумот, воедно, е и втора соработка помеѓу „ПМГ Џез“ и „Инвертед спектрум рекордс“ (Inverted Spectrum Records), издавачка куќа која делува помеѓу Анкара, Будимпешта и Белград.

До крајот на годината „ПМГ Џез“ најавува уште неколку изданија, почнувајќи од дуото Владан Дробицки и Глигор Кондовски и нивниот втор албум „Inward“, а потоа и проектот „Аспирин мун“ (Aspirin Moon) на Филип Букршлиев и Марија Грубор.

(Текстот е објавен во „Културен печат“ број 310, во печатеното издание на весникот „Слободен печат“ на 6-8.12.2025)