Продукцијата „Авалон“ најави дека Дина Јашари и нејзиниот бенд ќе го отворат концертот на „Дјуран Дјуран“. Македонската публика ќе има можност да ја чујат легендарната музичка група на 2 јули во СЦ Борис Трајковски во Скопје.

– Дина е едно од највозбудливите и најавтентични имиња на новата македонска музичка сцена, артистка која со својот уникатен звук, харизма и авторски печат успеа да ја освои публиката и критиката низ регионот и Европа. Овојпат, Дина, заедно со својот одличен бенд, ќе ја загрее сцената за еден од најголемите и највлијателни бендови на сите времиња, актуелен и денес – велат од продукцијата.

Ова е уште едно големо признание за Дина и нејзината музика, а за публиката уште една причина да дојде порано и да ужива во целовечерен настан на 2 јули во СЦ Борис Трајковски.

Таа важи за лидер на новиот македонски музички бран, а добитник е и на регионалната награда ,,Милан Младеновиќ” во 2022.

Дина го отвори и концертот на „Масив атак“ како прв концерт од ланското издание на „Скопје колинг“ на 28 јуни 2025 година, во организација на „Авалон“.