Државната изборна комисија (ДИК) досега одобрила акредитации за 591 странски и 658 домашни набљудувачи за локалните избори закажани на 19 октомври, соопшти претседателот на Комисијата, Борис Кондарко.

Тој информира дека околу девет илјади граѓани ќе гласаат од дома – болни, немоќни, изнемоштени лица, а конечниот список ќе биде објавен најдоцна до задутре на веб-страницата на ДИК.

На 143-та седница, Комисијата одобри и дополнителни набљудувачи за различни организации, вклучувајќи Младински културен центар-Битола, Институтот Ромалитико, Демокраси лаб-Тетово, Национален ромски центар-Куманово, ЦСИА Битола, како и набљудувачи од Косово и други здруженија.

ДИК исто така утврди техничка корекција на образецот 13г за предавање на уредите за биометриска идентификација, за да се избегне забуна при ракувањето со доверлив материјал.

Воедно, три приговори за лично избирачко право беа одбиени, бидејќи не исполнувале законски услови или лицата веќе биле запишани во Избирачкиот список.