„Делије“ огорчени по доаѓањето на Радуљица во Црвена звезда: Сега и никогаш повеќе
Навивачката група на Црвена звезда не е задоволна што некогашниот играч на Партизан е во црвено-бело. Слична ситуација да не се повтори, категорични се
Навивачката група „Делије север“ се огласи по доаѓањето на Мирослав Радуљица во КК Црвена звезда. Проблем е тоа што Радуљица настапувал за КК Партизан.
Оваа навивачка група е потполно против доаѓање во Звезда на фудбалери кои претходно играле за сениорскиот тим на Патизан, а за другите спортови е потолерантна во вакви случаи.
Но доаѓањето на Радуљица изгледа им го заостри критериумот и во кошарката.
– Имавме разговор со управата на клубот и се договоривме дека нема да направиме проблем со доаѓањето на Радуљица, но побаравме правилото од фудбалот да стане правило и за кошарката. Склучен е договор и во иднина нема да се носат во нашиот клуб играчи кои настапувале за сениорскиот тим на Партизан (ова се однесува на домашните играчи кои можат да го разберат нашето ривалство. А за потенцијалните странци ќе разгледуваме од случај до случај) – се вели во дел од соопштението на „Делије“.
Инаку Радуљица потекнува од ФМП, а во Партизан мина само една сезона (2011-2012). Проблемот е можеби тоа што центарот во 2011 година даде зајадлива изјава за Звезда.