Финансиско друштво издавало кредити онлајн од 90 илјади денари, на луѓе што прикажувале туѓи лични податоци и внесувале лажни телефонски броеви претставувајќи се со идентитет кој не бил нивен. Затоа, Агенцијата за заштита на личните податоци го казни со парична казна финансиското друштво за издавање брзи кредити, со  653.160,78 денари и 55.347 денари за одговорното лице. Прекршокот се однесува на Законот за заштита на личните податоци.

Според Агенцијата за заштита на личните податоци, Финансиското друштво спротивно на законот, без претходно обезбедена согласност за обработка на личните податоци при аплицирање за кредит обработувал лични податоци за три физички лица без да докаже дека тие дале согласност за обработка на нивните лични податоци.

Од страна на Агенцијата за заштита на личните податоци, изречена е глоба и на друштво за угостителство, туризам и трговија заради задржување на лични карти на гостите и попречување во вршење на вонредна супервизија односно контрола во објектот.

Агенцијата за заштита на личните податоци изрече глоба во износ од 380.109,72 денари за сторен прекршок на друштво за угостителство, туризам и трговија и глоба во износ од 21.522 денари за одговорното лице, затоа што спротивно на законот, друштвото задржувало и чувало лични карти на гостите по нивно евидентирање во книгата за гости се до нивното заминување.

Според пријавата, на гостите им било барано да ја платат сметката за престојот, за да си ја добијат назад личната карта.

Угостителскиот објект попречувал да се направи супервизијата на Агенцијата за заштита на личните податоци, за што е казнет со 190 илјади денари, а одговорното лице со 18 илјади денари.