Вардар во текот на денешниот ден треба да ја комплетира работата околу две нови имиња во ростерот. Дарко Велковски повторно ќе го облече црвено-црниот дрес, а нов член на тимот ќе стане и српскиот крилен фудбалер Стефан Цветковиќ.

Од таборот на најтрофејниот македонски клуб информираат дека договорите со двајцата фудбалери се веќе договорени и дека формализацијата на соработката се очекува во текот на денот.

Искусниот Велковски се враќа во Скопје како слободен агент, откако ја прекина соработката со Зрињски од Босна и Херцеговина. За Вардар настапуваше во периодот од 2015 до 2018 година, по што кариерата ја продолжи надвор од Македонија, играјќи за Ријека, Ал-Етифак, Динамо Букурешт, Ниреѓихаза и последно за Зрињски.

Покрај него, црвено-црниот дрес ќе го облече и 28-годишниот Стефан Цветковиќ, кој пристигнува од српскиот прволигаш Железничар Панчево. Станува збор за офанзивец кој дејствува по левата страна и важи за фудбалер со добри технички карактеристики.