Дали вештачката интелигенција може да го предвиди датумот на смртта — еве што велат истражувањата
Во времиња кога вештачката интелигенција (ВИ) секојдневно ги поместува границите на возможното, едно ново истражување отвора прашање кое е истовремено фасцинантно и вознемирувачко, дали е можно однапред да се знае кога ќе умреме? Научниот проект, заеднички спроведен од истражувачи од Данскиот технички универзитет и американскиот Северноисточен универзитет, покажа дека одговорот можеби веќе не е во доменот на научната фантастика.
Препорачано
Користејќи напредни модели на вештачка интелигенција, научниците развија систем способен со зачудувачка прецизност да го предвиди ризикот од смрт кај одредена личност.
Како функционира моделот „life2vec“?
Моделот, наречен „life2vec“, функционира слично како алгоритмите кои го предвидуваат следниот збор во реченицата, но наместо јазик, тој ги анализира човечките животи. Во неговата меморија се внесуваат огромни количини податоци, здравствени картони, образование, приходи, работен статус, па дури и детали како зачестеноста на посетите кај лекар или промените во кариерата. Врз основа на овие информации, вештачката интелигенција ги учи обрасците кои им претходат на одредени животни исходи, вклучувајќи ја и смртта.
Резултатите објавени во списанието „Нејчр“ се запрепастувачки. Во тестовите, моделот постигнал стапка на точност од дури 78 отсто, што е многу попрецизно од многу постоечки статистички методи кои се користат во медицината и осигурувањето.
Етички дилеми и целта на истражувањето
Сепак, зад оваа технолошка сензација се крие и низа сериозни етички дилеми. Што значи да се живее во свет во кој алгоритам може да го процени вашиот животен век? Кој има право на тие податоци. лекарите, осигурителните компании или државата? И можеби најважното, дали луѓето воопшто би сакале да знаат кога ќе умрат?
Научниците нагласуваат дека целта на истражувањето не е предвидување на смртта кај поединци од љубопитност, туку унапредување на јавното здравје. Прецизните прогнози би можеле да помогнат во раното откривање на ризичните фактори и подобра превенција на болестите. Идејата не е да се предвиди крајот, туку да се најде начин како да се продолжи животот.
Додека едни во ова гледаат револуција во медицината, други предупредуваат на опасност од злоупотреба и дехуманизација, прашувајќи се дали навистина сме само збир на предвидливи обрасци.
