Д-р Даниловски: Вакцините сега не спречуваат да се заразите, ама штитат од тешки симптоми и смрт
Со пандемијата имаме искуство веќе две години: секој нареден сој беше позаразен од претходниот и секој од нив го заобиколуваше имунитетот од претходниот вирус, а вакцините останаа исти, рече епидемиологот д-р Драган Даниловски во вечерашното гостување на телевизија Сител.
-Омикронот го заобиколува имунитетот и сега, имајќи предвид дека вакцинираните се заразуваат, излегува дека вакцините се неефикасни. Добрата вест е што штитат од тешки симптоми и смрт. Бидејќи омикронот е позаразен, потребни се повисоки антитела за да се спречи инфекција и заради тоа најзаштитени од овој сој се оние кои прележале и имаат примено две дози вакцини, но битно е колку време поминало од прележувањето, како и од вакцините. Третата доза е најдобра одбрана од повторна инфекција затоа што го бустира имунитетот, вели Даниловски.
Тој смета дека омикрон е „почеток на крајот на пандемијата“.
-Мислам дека омикронот е почеток на крајот – малку е веројатно да се случи катаклизма поради појава на нови варијанти, вели епидемиологот.