Извршниот директор на американската JPMorgan и еден од најпочитуваните банкари во светот, Џејми Дајмон, предупреди дека финансиската состојба во светот сè повеќе наликува на ситуацијата непосредно пред финансиската криза во 2008 година. Според Џејми Дајмон, моменталната состојба во финансиската индустрија не е охрабрувачка. Банкарот забележува сличности со периодот пред финансиската криза од 2008 година, кога масовното кредитирање заврши со катастрофа.

„За жал, го видовме ова во 2005, 2006 и 2007 година, повеќе или помалку истото – растечка плима што ги крева сите бродови, сите заработуваат многу пари“, рече Дајмон за време на состанокот со инвеститорите во понеделникот.

Тој, исто така, истакна дека многу банки сега се подготвени да даваат поризични кредити за да ги зголемат своите нето каматни приходи.

„Гледам луѓе како прават глупави работи. Тие прават глупави работи за да создадат нето кредитен приход“, рече Дајмон, кој ја водеше JPMorgan Chase & Co. за време на најлошата финансиска криза во последните години.

Дајмон не прецизираше на кои институции се осврнува и ги увери инвеститорите дека неговата банка, најголемата во земјата, е доста претпазлива, истакнувајќи дека ги следат правилата. Тој верува дека кредитниот циклус повторно ќе се влоши. Сепак, не прецизираше кога би можело да се случи тоа. Дајмон, исто така, призна дека вештачката интелигенција предизвикува голема загриженост на пазарите во последно време. Инвеститорите се загрижени за нејзиното влијание врз нивната ситуација. Сепак, тој нагласи дека сè уште е уверен во иднината на неговата банка- објави Кликс.ба.