„Чкембари“ поради бојкотот пред сала ќе го бодрат Еурофарм Пелистер против Вардар 1961
По поразот на Еурофарм Пелистер во Скопје од директниот конкурент за шампионската титула во Македонија, Вардар 1961, навивачката група „Чкембари“ најавија бојкот до крајот на сезоната.
На 6 мај во салата „Боро Чурлевски“ во Битола ќе се игра најважниот натпревар во битката за шампионската титула помеѓу Еурофарм Пелистер и Вардар 1961 кои имаат по 33 бодови.
И покрај поразот во СЦ „Јане Сандански“ од 31:24 на 26 март, се вратија надежите на битолската екипа откако скопските „црвено-црни“ загубија од РК Алкалоид на 1 април со 22:21.
Бојкотот на „Чкембари“ продолжува, и својата поддршка за ракометарите на Еурофарм Пелистер ќе ја даваат пред спортската сала „Боро Чурлевски“.
– САБОТА ЦЕЛА БИТОЛА ПО ТИТУЛА! „ЧКЕМБАРИ ВЕЧНО ЌЕ СО СЕ ТЕБЕ“, токму како што знаат само тие да згрмат, Чкембари поради бојкотот натпреварот ќе го следат на видео-бим пред спортската сала „Боро Чурлевски“! – најавија „Чкембари“.