Најмалку 14 лица загинаа како резултат на поплави и лизгање на земјиштето предизвикани од поројните дождови во Шри Ланка, јави Ченел Њуз Ејжа (Channel News Asia).

Според Националната управа за управување со катастрофи, најмалку 10 лица загинаа во поплавите и уште четири во свлечиштата. Две лица се водат за исчезнати.

Вкупно 33 спасувачки бригади, кои се дел од морнарицата на земјата, се испратени во поплавените подрачја. Според последните информации, спасени се 66 лица.

Обилните дождови врнат во четири региони на Шри Ланка од четвртокот, вклучително и во главниот град Коломбо и околните градови.

Под вода се станбени згради, полиња со ориз и патишта. Катастрофата погоди околу 245.000 луѓе и повеќе од 800 куќи се целосно уништени.