Поранешниот тренер на фудбалскиот клуб Барселона, Чави Ернандез, откри дека Лионел Меси беше многу блиску до враќање во каталонскиот клуб на почетокот на 2023 година, но дека целиот договор на крајот пропаднал во последен момент.

По Светското првенство во 2022 година, имаше многу шпекулации дека Аргентинецот би можел да се врати во Барселона каде ги имаше најголемите успеси во својата кариера. Но, одлучи да ја продолжи кариерата во американскиот Интер Мајами во летото 2023 година, каде што започна ново поглавје во МЛС лигата. Сега, поранешниот тренер на Барса, Чави Ернандез, откри интересни детали за тоа зошто големиот камбек никогаш не се случил. Во интервјуто за весникот Ла Вангардија, тој рече дека Меси беше многу блиску до враќање на стадионот Камп Ноу.

– Жоан Лапорта не ја кажува вистината. Лео сè уште беше под договор во тоа време. Во јануари 2023 година, откако стана светски шампион, стапивме во контакт и тој ми рече дека со нетрпение очекува да се врати. Подоцна се сретнав со него лично – објасни Чави.

Според него, договорот практично веќе бил договорен. Но, исто ја откри причината зошто планот не успеа.

– Лапорта веќе преговарал за договор со таткото на Лео, имавме и зелено светло од Ла Лига, но на крајот претседателот го запре целиот проект. Лапорта ми рече дека враќањето на Меси би предизвикало голема дебата за платите во клубот и дека Барселона не може да си го дозволи тоа во тој момент. После тоа, Лео одеднаш престана да се јавува на телефон бидејќи му рекоа дека враќањето не е можно – вели Чави.

Неговите изјави доаѓаат во многу чувствителен момент за каталонскиот клуб. Барселона се подготвува за претседателските избори на кои сегашниот претседател Жоан Лапорта ќе се соочи со противникот Виктор Фонт, кој ја ужива поддршката на Чави. Лапорта неодамна призна дека неговиот однос со Меси не е идеален, бидејќи аргентинскиот ас верува дека тој е одговорен што морал да го напушти клубот во 2021 година. Претседателот на Барселона набрзо проговори за изјавите на Чави, но го префрли фокусот од Меси на својот поранешен тренер.

– Кога ги гледам овие изјави, помислувам на Ханси Флик. Разбирам дека Чави е повреден, бидејќи Флик победува со истите играчи со кои работеше претходно – рече Лапорта.