Автобусот е толку уништен што не може да се утврдат податоците од техничкиот уред кој го снима движењето на автобусот – тахографот. Сè е изгорено. Ова го изјави извршниот директор на Извршната агенција „Авто управа“ Бојко Рановски во врска со инцидентот во кој загинаа 45 лица откако се запали патнички автобус со македонска регистрација на автопатот Струма.

Седум лица се повредени и пренесени во болница. Автобусот сообраќал од Турција кон Северна Македонија.

Инаку, тахографот е инструмент за мерење кој служи за автоматско снимање на брзината и времето на патување на возилото, како и видот и времетраењето на активноста на возачот.

Тој посочи дека според информациите на институцијата со која раководи, од граничниот премин Капитан Андреево до местото на несреќата не се регистрирани прекршувања на сообраќајните правила.

„Нема докази дека возел со голема брзина. Сите задолжителни паузи се запазени“, изјави тој за БНР.

„Според податоците од камерите од граничните пунктови и Агенцијата за патишта, истражните органи можат да извлечат информации кои се неопходни за утврдување на причините за сообраќајната несреќа“, додаде Рановски.

Според Николај Иванов, претседател на УО на гранковната организација „Безбедност на патиштата“, во Бугарија не се издвојуваат доволно средства за инфраструктура.

„Мора да се види учинокот – лоша случајност, градежните работи ги вршела македонска фирма. Маврово-Скопје се вика“, додаде тој.

Тој рече дека идната влада треба да даде приоритет на безбедноста на патиштата и инфраструктурата.

ФОТО+ВИДЕО | ВО ЖИВО: Сите информации за тешката сообраќајна несреќа во Бугарија