Босанскиот рапер Амар Хоџиќ, познат како Буба Корели, му исплатил на Врховниот суд на Федерацијата Босна и Херцеговина околу 12.000 евра, со што затворската казна од осум месеци, на која бил осуден поради затајување данок, е заменета со парична казна, пишува „Кликс.ба“.

Посебното одделение за сузбивање на корупција, организиран и меѓукантонален криминал при Врховниот суд претходно соопшти дека тој ја признал вината за затајување данок и уплатил околу 59.000 евра на сметка на Управата за јавни приходи.

„Долгот кон државата е целосно подмирен. Во однос на затворската казна, согласно законот е искористена можноста таа да се замени со парична казна“, изјавил неговиот адвокат Сеад Зијадиќ.

Да потсетиме, Буба Корели претходно се пошегувал на сопствена сметка по објавувањето на пресудата.

„Ме праша за данок, реков: ‘Не сум’“, изјавил тој, алудирајќи на изменет стих од песната „Торонто“, која ја изведува со Јала Брат, по што се насмеал.