Почина осумнаесетгодишно момче кое беше повредено во пожарот во барот во Кран-Монтана, соопшти денеска швајцарската новинска агенција Keystone-SDA, повикувајќи се на обвинителството.

Јавната обвинителка на кантонот Валис, Беатрис Пилу изјави:

„18-годишен швајцарски државјанин почина во болница во Цирих на 31 јануари. Бројот на жртви од пожарот во барот „Ле Констеласион“ на 1 јануари 2026 година сега се искачи на 41.“

Пилу изјави дека нејзината канцеларија, која ја истражува трагедијата, во оваа фаза нема да објави дополнителни информации.

Загинатите во катастрофата беа на возраст од 14 до 39 години, а повеќето беа тинејџери. Само четворица беа на возраст над 24 години. Уште 115 лица беа повредени, од кои повеќето се уште се во различни болници.

Јавните обвинители веруваат дека пожарот започнал кога во објектот дел од присутните кренале шишиња шампањ со прскалки прикачени премногу блиску до пената за звучна изолација на таванот на барот.

Четири лица се под кривична истрага: ко-сопствениците на барот, раководителот на јавната безбедност на општината Кран-Монтана и поранешен службеник за противпожарна безбедност во Кран-Монтана.

По пожарот, сериозно повредени пациенти биле префрлени со хеликоптер во разни болници и специјализирани одделенија за изгореници низ Швајцарија и во четири други европски земји.