Децата во Британија кои имаат 17 години или помалку, односно родени по 2008 година, а воедно и секој што ќе се роди по таа година во иднина, никогаш нема да можат легално да купуваат цигари, одлучија британските законодавци, пренесува Ројтерс.

Законот за тутун и вејпови секоја година ја зголемува законската возраст за купување тутун за една година, почнувајќи од луѓето родени на или по 1 јануари 2009 година, што значи дека засегнатите возрасни групи се соочуваат со доживотна забрана.

Законот, кој треба да добие кралска согласност следната недела, исто така ги заострува контролите врз вејпингот, вклучувајќи забрана за продажба на вејпинг и никотински производи на луѓе под 18 години и ограничување на рекламирањето, изложувањето, бесплатната дистрибуција и попустите.

Владата вели дека мерките ќе помогнат да се намали пушењето и да се спречи младите луѓе да станат зависни од никотин, олеснувајќи го долгорочниот притисок врз Националната здравствена служба.

Министерот за здравство Вес Стритинг изјави дека одобрувањето на законот е „историски момент за здравјето на нацијата“.

„Децата во Обединетото Кралство ќе бидат дел од првата генерација без чад, заштитени од доживотна зависност и штета“, рече тој.

„Превенцијата е подобра од лекувањето – оваа реформа ќе спаси животи, ќе го олесни притисокот врз Националната здравствена служба и ќе изгради поздраво Обединето Кралство“, дополни Стригинг.

Пушењето предизвикува околу 64.000 смртни случаи и 400.000 болнички приеми годишно во Англија, според официјалните проценки, и го чини здравството околу 3 милијарди фунти (4 милијарди долари) годишно, додека пошироките економски трошоци надминуваат 20 милијарди фунти.

Построги правила за вејпинг

Вејпингот исто така стана фокус за креаторите на политики, особено поради загриженоста за неговото користење кај младите и зависноста од никотин.

Владата минатата година ја забрани продажбата на еднократни или за еднократна употреба вејпови поради загриженост за нивната употреба кај младите и штетата врз животната средина.

Новата легислатива ќе ги заостри тие правила, при што министрите ќе добијат овластувања да ги регулираат вкусовите и пакувањето на тутунските, вејпинг и никотинските производи преку секундарно законодавство.

Околу 10% од возрасните во Велика Британија, проценети 5,5 милиони луѓе, користат вејпови, според здравствената организација „Акција кон пушењето и здравјето“, при што нивото е во голема мера непроменето од 2024 година, што сугерира дека растот почнал да се стабилизира.

Околу половина од луѓето кои вејпираат се поранешни пушачи, додека околу 40 отсто продолжуваат да пушат паралелно со вејпирањето, соопшти организацијата.

Обрачот против тутунот се стега низ Европа

Во 2024 година, околу 173 милиони луѓе во европскиот регион на СЗО биле корисници на тутун. На европскиот континент секоја година тутунот е причинител на повеќе од 1,1 милиони смртни случаи од незаразни болести.

Светската здравствена организација забележа дека меѓу 53 земји во европскиот регион само 18 имаат закони за забрана на пушење што ги покриваат сите јавни простори.

Некои земји како Франција, Финска, Италија и Шведска, наметнуваат ограничени забрани на плажите, во училиштата и парковите.

Како е во Македонија?

Ново истражување за употреба на тутун кај младите покажу системски недостатоци на повеќе нивоа – од висока достапност на цигарите во продавници и киосци, каде што основците меѓу шесто и деветто одделение можат да набават тутун без поголем проблем, па сѐ до висока изложеност на децата на чад внатре и околу училиштата.

Дури 73,2 отсто од учениците меѓу 13 и 15 години не биле спречени да купат цигари поради нивната возраст, а 69 проценти од младите пушачи купиле тутун во продавница, маркет, супермаркет или киоск. Точно 13,6 проценти од учениците моментално користат некаков тутунски производ и тоа е највисоката зачестеност досега регистрирана во Македонија.

Ученици непречено си купуваат цигари како да се мастики, покажува ново истражување

Вкупно 10 отсто од нив вдишуваат од електронски цигари, што е повеќе од двојно зголемување во споредба со 2016 година. Најголем раст кај е-цигарите има кај девојчињата – од 1,9 на 9,6 отсто за помалку од една деценија.

Законот за заштита од пушење не стапи на сила од 1 март, како што беше предвидено во предложеното законско решение. Наместо тоа, неговата имплементација ќе биде во фази, почнувајќи со едукација и опомени, а казните ќе следуваат подоцна.

Економија наспроти здравје: Антипушачкиот закон отвори дискусија за приоритетите на државата