Велика Британија одобри користење на своите воени бази од страна на САД за напад врз ирански цели поврзани со напади врз бродови во Ормускиот теснец.

Британските претставници изјавија дека одлуката е донесена на состанок на кабинетот и се однесува на продолжување на претходното овластување според кое американските сили би можеле да ги користат британските бази за одбрана од ирански напади, јавува Ројтерс.

Канцеларијата на британскиот премиер Кир Стармер соопшти дека базите сега ќе бидат достапни за „американски одбранбени операции“ фокусирани на „способностите што се користат за напад врз бродови во Ормускиот теснец“. Тие нагласија дека Обединетото Кралство нема директно да учествува во нападите и дека „фундаменталните принципи на пристапот кон конфликтот не се менуваат“, нагласувајќи ја потребата од итна деескалација.

Војната меѓу Иран и Израел и САД трае веќе три недели, откако Израел започна напади врз ирански воени и нуклеарни цели, со поддршка на САД. Иран возвраќа со ракетни напади врз израелски цели и американски интереси во регионот, а конфликтот се прошири и на поморските патишта.

Ормускиот теснец, низ кој минуваат голем дел од светските резерви на нафта, стана една од клучните точки на кризата. Нападите врз бродовите и заканите за затворање на преминот веќе сериозно го нарушија сообраќајот и драматично ги зголемија цените на енергијата.