Брисел наводно одбил да ја прими Теута Арифи за македонска амбасадорка во ЕУ
Поранешната вицепремиерка, пратеничка и градоначалничка на Тетово, Теута Арифи, не добила зелено светло од Брисел за позицијата македонски амбасадор во Европската унија, на која ја предложила Владата, објави МКД.мк, повикувајќи се на дипломатски извори.
Во март, медиумите пишуваа дека Арифи била предложена за амбасадорка во Вашингтон, од каде исто така не добила агреман.
Од МНР за „Слободен печат“ велат дека не можат да ја потврдат информацијата за наводното одбивање од Брисел, бидејќи за ваквите прашања се расправало на затворена владина седница, од која со закон е забрането да се изнесуваат информации.
Арифи, која е потпретседателка на ДУИ и своевремено беше вицепремиерка за европски прашања во Владата на Никола Груевски, минатата есен, по два мандати како градоначалничка на Тетово, ја загуби функцијата откако доживеа убедлив пораз од противкандидатот Биљал Касами од Беса.