Силекс одигра одличен натпревар и со убедливи 4:0 ја совлада Брера на отворањето на 28. коло од Прва македонска фудбалска лига.

Кратовци од самиот старт покажаа поголема енергија и иницијатива, а резултатот го отворија уште 19. минута, кога Едис Бутуровиќ најдобро се снајде во мешаницата пред голот на гостите и ја затресе мрежата.

Гостите од Струмица не успеаја да се вратат во игра по паузата, што домаќините максимално го искористија. Само што почна второто полувреме, Додев во 48. минута зголеми на 2:0, а десетина минути подоцна Алиќ погоди и за убедливи 3:0. Точката на натпреварот ја стави Пиреш со голот во 69. минута, за конечни 4:0.

За Брера ова беше прв пораз по серијата од четири натпревари без неуспех, додека избраниците на Александар Васоски со новите три бода стигнаа до бројката од 52 и сериозно се доближуваат до Струга на третата позиција на табелата.