Бранислав Лечиќ прозборе откако кривичната пријава на Даниела Штајнфелд била одбиена од Вишото јавно обвинителство
Бранислав Лечиќ прозборе за „Блиц“ откако Вишото јавно обвинителство во Белград ја отфрли кривичната пријава на Даниела Штајнфелд против него.
„Сè уште не би сакал да коментирам ништо, бидејќи официјално го немам тоа сознание. Ако им верував на медиумите и на другите, а не на законот, ќе помислев дека сум чудовиште. Така ќе го почитувам законот и ќе почекам официјално да ме известат, па ќе дадам изјава“, рече Бранислав Лечиќ.
Српските медиуми сè уште немаат увид во одлуката на обвинителството, а причините за одбивањето на кривичната пријава сè уште не се познати.
Да потсетиме, актерката Даниела Штајнфелд во својот документарец откри дека била жртва на силување, а потоа ги објави јавно тврдењата дека ја силувал „моќен човек од филмската индустрија“.
Само неколку месеци подоцна, таа пријавила во полиција дека во 2012 година била силувана од постар колега – инаку добро познатиот актер Бранислав Лечиќ.
И Лечиќ и Штајнфелд во март беа испрашувани и сослушани во врска со тврдењата на актерката. Лечиќ ги негираше обвинувањата од самиот старт.
Потоа, во овој случај имаше затишје, а потоа актерката Мерима Исаковиќ за весникот „Неделник“, откри дека во 1978 година, во времето кога тие биле колеги на Факултетот за драмски уметности во Белград, Лечиќ ја злоставувал сексуално. Таа рече дека е подготвена да сведочи против Лечиќ.