Брајан Џонсон, технолошки претприемач и биохакер познат по своите обиди да го забави стареењето и да го продолжи животот, објави дека му е дијагностицирана сериозна и неизлечлива автоимуна болест која го загрозува неговото здравје, пишува „Њујорк пост“.

Тој на социјалните мрежи соопшти дека боледува од автоимун гастритис, состојба при која, како што објаснува, неговиот „желудник сам себе се напаѓа“.

Bad news #1:

I have an autoimmune disease. My stomach is eating itself.

Bad news #2:

2–5% of people have this, too. Likely more, because it hides.

Good news:

I’m going to try and solve it. Will share all.

As a kid, I ate sugar cereal, drank sugary soda, and gobbled down… pic.twitter.com/EbJ8a916uS

— Bryan Johnson (@bryan_johnson) June 30, 2026

Сепак, нагласува дека не планира да се помири со дијагнозата.

„Ќе се обидам да најдам решение“, порача Џонсон, додавајќи дека ова заболување се јавува кај само 2 до 5 проценти од населението.

Иако денес живее строго контролирано и внимателно го оптимизира секој аспект од своето здравје, тој признава дека тоа не било секогаш така.

„Како дете јадев слатки житни снегулки, пиев газирани пијалаци полни со шеќер и често консумирав брза храна. Во раните дваесетти имав неколку поздрави години, но потоа станав млад татко на три деца и започнав да градам компанија. Со целиот тој стрес и темпо целосно го запоставив здравјето и се здебелив околу осумнаесет килограми. За неколку години западнав во тешка хронична депресија. Во тој период моето тело започна автоимун процес кој прво ја зафати штитната жлезда, а потоа и слузницата на желудникот“, напиша тој.

Џонсон вели дека хипотиреоидизам, состојба во која штитната жлезда не произведува доволно хормони, му бил дијагностициран на дваесет и една година при рутински крвни анализи.

Веднаш започнал терапија, но тогаш не знаел дека во неговото тело се одвива и друг сериозен процес.

„Секојдневното земање на лековите ми овозможи телото да функционира како штитната жлезда да работи нормално. Но не знаев дека во меѓувреме мојот желудник започнал сам да се напаѓа. За тоа не постоеше рутински тест и немав никакви симптоми.“

 

View this post on Instagram

 

A post shared by Bryan Johnson (@bryanjohnson_)

Болеста откриена случајно

Автоимуниот гастритис, вели тој, бил откриен дури во мај оваа година.

„Не знам колку долго го имам. Оваа болест предизвикува неповратни оштетувања, нутритивни дефицити, анемија и долгорочно го зголемува ризикот од рак. Кога денес се дијагностицира, стандардната медицина практично признава дека нема лек и дека може само да се држи под контрола, без разлика колку последиците можат да бидат сериозни или дури смртоносни.“

Кај лицата со автоимун гастритис често нема изразени симптоми. Кога се јавуваат, тие можат да вклучуваат болки во стомакот, недостаток на железо, намален апетит, мачнина или необјаснето слабеење.

Иако земал суплементи со железо, неговото ниво на феритин останувало ниско, поради што лекарите започнале подетални испитувања.

Колоноскопија го исклучила ракот на дебелото црево, по што бил направен детален преглед на дигестивниот систем и анализа на крвни биомаркери.

Резултатите покажале зголемени антитела против париеталните клетки на желудникот, што укажувало на автоимун гастритис. Состојбата настанува кога имунолошкиот систем ги напаѓа здравите клетки на желудникот и почесто се јавува кај лица со семејна историја на автоимуни заболувања.

Конечната потврда била добиена преку биопсија на желудникот, која покажала почетно оштетување на слузницата.

Еден проблем го влошува другиот

Џонсон објаснува дека неговите здравствени состојби се меѓусебно поврзани.

Недостатокот на железо, автоимуниот проблем со штитната жлезда и автоимуниот гастритис создаваат затворен круг кој се влошува сам по себе.

„Железото и штитната жлезда зависат едно од друго. Недостатокот на железо ја отежнува претворањето на хормоните на штитната жлезда во нивна активна форма, додека забавената функција на штитната жлезда ја намалува способноста на организмот да го користи железото.“

Иако автоимуниот гастритис не може да се излечи, може да се контролира со инјекции на витамин Б 12 и инфузии со железо. Џонсон веќе примил инфузија од 1000 милиграми препарат „Моноферик“.

Сепак, тој не планира да застане во потрагата по нови решенија.

Неговиот тим ќе продолжи со редовно следење на низа параметри, меѓу кои феритин, железо, витамин Б дванаесет, како и други биомаркери, а ќе се повторуваат и биопсии на желудникот со цел развој на понатамошни експериментални терапии.

ФОТО | „Целиот бев отечен, не можев да гледам“: Контроверзниот милијардер направи нов третман за подмладување, нештата тргнаа наопаку!