Брачен пар успеал да избега од старечки дом со помош на Морзеова азбука
Еден брачен пар кој бил згрижен во домот за стари и немоќни лица „Елмкрофт“ во Тенеси, САД успеал да побегне од домот со помош на Морзеова азбука.
Парот, кој имал деменција и боледувал од Алцхајмерова болест, успеале да го дешифрираат и да го запаметат кодот на електронската врата во нивниот дом „Елмкрофт“, објави „Nashville Tennessean“. Тие биле надвор од домот околу 30 минути на 2 март, пред некој случаен минувач да ги забележи два блока од нивното живеалиште.
Сопругот рекол дека претходно работел со Морзеова азбука додека бил во војска и го искористил тоа искуство за да го меморира кодот со кој вработените ја отварале вратата. Тој и неговата сопруга така успеале да ја отклучат вратата и да го напуштат домот.
Државните службеници го казниле домот за стари лица со 2.000 американски долари поради бегството. Од институцијата велат дека ги смениле сите кодови за излез и ќе спречат слични инциденти со почести проверки.
„Безбедноста е главниот приоритет на нашата заедница за стари лица. Благодарни сме што парот беше безбедно вратен во домот. Ние веднаш ја пријавивме ситуацијата до надлежните и нивното семејство и целосно соработувавме со државата“, рекле од домот.