Високиот претставник за надворешна политика на ЕУ, Жосеп Борел, ја поздрави добрата соработка со САД околу дијалогот Белград- Приштина после години тензии со администрацијата на Доналд Трамп, јави дописничката на МИА од Брисел.

Тој одговарајќи на новинарско прашање дали зборувал со американската страна за спорот помеѓу Србија и Косово, Борел рече дека разговарал со неговиот колега, Ентони Блинкен.

– Сега има многу добра соработка помеѓу САД и Европа, нема повеќе конкурентност од страна на САД, не пробуваат да надвладеат во дијалогот, ова е процес што го води ЕУ, имаме силна соработка и тоа ќе помогне, рече Борел.

Денеска во Луксембург се одржа Советот за надворешни работи на министрите на ЕУ, на кој главна тема беше Белорусија и санкциите против режимот на Лукашенко. Борел ги брифирал министрите за последната рунда на дијалогот помеѓу Белград и Приштина што се одржа минатата недела во Брисел и изрази надеж дека е можен нов состанок летово.