Специјално за домашната македонска публика музичката група „Код 369“ го објави синглот „Револуција“, а песната е препеана од англиски на мајчиниот македонски јазик.

„Револуција“ е тема која инспирира со позитивниот текст и ведрата и динамична музика и истовремено поттикнува на размислување за општествени промени и промените кои човештвото мора да ги превземе, порано или подоцна, за да го задржи блиското и непосредното, паралелно со сѐ поприсутното виртуелно живеење.

Синглот е проследен со слика – авторско дело на битолскиот уметник Виктор Лозанов. Сликата е претставена во форма на графит на кој вокалистката на „Код 369“, Ирена Димовска-Митревска, повикува на интелектуална револуција. Истиот е инспириран од делата на глобално познатиот графити уметник Бенкси, известија од „Баги Комуникации“.

Битолската група „Код 369“ оствари извонреден успех на музички план во текот на 2022 година, а потпишаниот договор со „Кроација рекордс“ и објавата на албумот „Стадиуми на љубовта“ им ги отвори портите кон целиот регион.