Тренерот на Шкендија, Јетон Беќири, изрази задоволство по најновиот европски настап на тетовскиот тим, нагласувајќи дека клубот со скромни амбиции ја започнал европската авантура, но со желба постепено да напредува и да освојува важни бодови.

„Секако дека сме задоволни, ние со скромни амбиции почнавме во Европа, па сакам така и да продолжиме. Бодовите во Европа се многу важни, затоа што одат во корист и на целата лига“, изјави Беќири, додавајќи дека моменталната форма на екипата не е на највисоко ниво.

„Сепак, треба да кажеме дека оваа Шкендија не е најдобрата и се надевам дека во наредните натпревари ќе одиграме подобро за да дојдеме и до нови бодови. Среќата ги следи храбрите – денеска беше на наша страна, но ние работиме секојдневно и ја заслуживме таа среќа“, додаде стратегот на тетовци.

Беќири истакна дека победата има особена тежина ако се знае дека противникот е тим со квалитет и резултати во Европа.

„Игравме против квалитетна екипа која ја победи и Риека и одигра реми со Хакен. Не треба да се мисли дека во Европа има лесни бодови“, порача тренерот.

Воедно, тој се пожали и на состојбата на теренот на арената каде што се одигра натпреварот.

„Навистина ми е жал што во овој момент состојбата на теренот беше лоша, па моравме да играме на таков терен“, заврши Беќири.