Новороденче со штотуку пресечена папочна врвца е пронајдено напуштено на скалите на една од најпрометните станици на њујоршкото метро на Менхетен, за време на утринскиот шпиц.

Бебето, од женски пол, било пронајдено на скалите што водат кон јужните линии 1, 2 и 3, на станицата „34th Street Penn Station“, во централниот дел на Менхетен, околу 9:30 часот наутро, соопштија властите, пренесе „Дејли мејл“.

Непознато лице ја повикало итната служба 911 откако го пронашло детето. Итната помош брзо пристигнала и го пренела бебето во болницата „Белвју“. Според официјалните лица, бебето е во стабилна состојба.

„Јас го нарекувам ова чудо на 34-та улица. Пожарникарската служба и полицијата реагираа и го пронајдоа напуштеното бебе“, изјави Деметриус Кричлоу, претседател на њујоршкиот градски превоз.

Во тек е истрага за да се утврди кој го оставил новороденчето на станицата. Властите ги прегледуваат снимките од бројните безбедносни камери во станицата.

Во сојузната држава Њујорк, напуштањето дете помладо од 14 години се смета за кривично дело. Законот за заштита на напуштени новороденчиња (Abandoned Infant Protection Act) му овозможува на родителот анонимно да остави новороденче старо до 30 дена, под услов тоа да биде оставено на безбедно место, како што е болница, полициска или противпожарна станица, и на начин што нема да ја загрози неговата безбедност.

Њујоршкото метро секојдневно превезува околу 3,9 милиони патници. Сепак, бројот на патници е многу поголем во работните денови отколку за време на викендите, поради луѓето што го користат превозот за да стигнат до училиште или на работа.

Пред повеќе од една деценија, на 7 јули 2014 година, 20-годишна мајка со ментално заболување го оставила своето десетмесечно дете на перонот на метро-станицата „Колумбус Серкл“ на Менхетен. Подоцна им кажала на полициските службеници дека била преплашена откако провалници го убиле таткото на бебето.

Помалку од две години подоцна, екипаж на брод во Сент Луис, Мисури, го пронашол телото на мајката како плива во реката Мисисипи.