Капитенот на Челси и шпански репрезентативец Сезар Аспиликуета по завршување на сезоната, ќе се пресели во Барселона, пишува каталонскиот весник „Спорт“.

Договорот на Аспиликуета завршува во јуни и според весникот, Барселона го искористила тоа и стапила во контакт со претставниците на фудбалерот и според „Спорт“се е договорено, но се чека крајот на сезоната за да се официјализира потписот.

Аспиликуета во Челси дојде во 2012 година од Олимпик Марсеј, а ова му е трета сезона во која е капитен на англискиот премиерлигаш за кого досега одигра 458 натпревари и постигна 15 гола.

Покрај Аспиликуета, Барселона сака да ангажира уште еден дефанзивец на Челси и тоа по истиот рецепт, Андреас Кристенсен. Договорот на Кристенсен истекува на крајот од сезоната и Данецот ги одби сите понуди на Челси за продолжување на соработката бидејќи сака нов предизвик во кариерата. Покрај Барселона, сериозен интерес за Кристенсен пројавуваат и Баерн Минхен и Интер.