Барселона официјално соопшти дека натпреварот од 13. коло во Ла Лига против Атлетик Билбао ќе се одигра на 22 ноември, со почеток од 16:15 часот, на реконструираниот Ноу Камп.

Клубот доби прва административна дозвола што одговара на Фаза 1Б, со што е овозможено отворање на дел од трибините и прием на вкупно 45.401 гледач за овој дуел.

„Оваа дозвола ја опфаќа целата зона на страничната трибина и се надоврзува на веќе издадената дозвола за Фаза 1А, која ги опфаќа Главната и Јужната трибина. Клубот продолжува да работи и на Фаза 1Ц, со цел да се овозможи продолжување на активностите на Северната трибина“, стои во клупското соопштение.

Реконструкцијата на легендарниот стадион започна во јули 2023 година. Додека траат градежните работи, Барселона ги играше своите домашни натпревари на Олимпискиот стадион. По завршувањето на целосната обнова, Ноу Камп ќе има капацитет од околу 105.000 седишта, што ќе го направи еден од најголемите и најмодерни стадиони во Европа.