В четврток од 20:45 часот најдобрата македонска фудбалска репрезентација ќе игра против Данска во Копенхаген во полуфиналето од плејофот за пласман на Светското првенство кое ќе се одржи летово.

Своите очекувања за утрешниот меч на денешната прес-конференција ги сподели капитенот на нашата селекција, Енис Барди.

Фудбалерот на турскиот клуб Коњаспор смета дека новите игрчаи одлично се вклопија и дека атмосферата во тимот е на високо ниво.

-Добро ги анализиравме и ги подготвивме сите детали. Свесни сме против кого играме и што не чека, но и ние имаме свои адути. По претходните натпревари извлековме важни лекции и тие ни помогнаа да се подобриме како тим. Новите играчи се вклопија одлично и атмосферата во тимот е на високо ниво, функционираме како едно. Во вакви натпревари мотивацијата никогаш не недостасува. Потценувањето само дополнително нè мотивира. Поддршката од навивачите секогаш ја чувствуваме и ќе дадеме сè од себе да ги направиме горди – рече Барди.

Во составот има тројца играчи кои за првпат ќе го носат дресот на македонската репрезентација, дефанзивецот на Борац Бања Лука, Себастијан Ерера, стоперот на тетовска Шкендија, Имран Фетаи и напаѓачот на Сиетл, Дени Мусовски. Во составот има и фудбалери кои по извесна пауза повторно се дел од најдобрата селекција и тоа: Бобан Николов од Вардар, Љупче Дориев, кој настапува во првенството на Узбекистан, како и Егзон Бејтулаи од Дрита.