„Brooks Brothers“, производител на машка облека кој постои 200 години и кој во своето постоење облекувал 40 американски претседатели поднесе барање за банкрот. Тој е познат и како омилен бренд на банкарите и брокерите од „Wall street“.

Компанијата која е во приватна сопственост извесен период се бореше со пазарот имајќи предвид дека деловната облека во последниот период стана се полежерна, а секако тука е и влијанието на корона вирусот, кој ја запре побарувачката за одела.

Голем број работници работат од дома и тие се одлучуваат за лежерен и опуштен изглед кој предвидува носење на маички и тренерки, а не одела шиени по мерка.

– Иако пандемијата сериозно ги наруши изгледите за опоравување на работата, „Brooks Brothers“ и претходно покажа дека не е во можност да се прилагодува на променливите трендови, вели Нил Сандерс, директор на компанијата „Global“.

Тој додава и дека кога станува збор за вкус и стил, „Brooks Brothers“ „пливале спроти плимата“, односно спротивно од трендовите. Тие во јуни предупредија дека ќе отпуштат 700 работници.

Компанијата во моментов разгледува различни стратешки опции, меѓу кои и евентуална продажба. Сопственикот е веќе во процес на затварање на 20 проценти од своите 250 продавници ширум Америка.

„Brooks Brothers“ ја отвори својата прва продавница во 1818 година во близина на „Wall street“.