Поранешниот премиер и претседател на ВМРО-ДПМНЕ кој сега е азилант во Унгарија, Никола Груевски има најголем рејтинг во државава, покажуваат податоците од последната анкета на ИРИ.

На прашањето „Кога размислувате за луѓето во политичкиот живот, на која личност од Северна Македонија гледате најповолно“, за Груевски се определиле 7%, што е за 4 проценти повеќе во однос на анкетата од 2021 година.

Поголем рејтинг од претходната анкета има и лидерот на ДУИ, Али Ахмети, кого го поддржуваат 6 отсто од анкетираните, и тоа е за еден процент повеќе од лани, а претседателот на Левица, Димитар Апасиев сега има поддршка од 3 отсто од анкетираните или еден процент повеќе од лани.

Актуелниот претседател на ВМРО-ДПМНЕ, Христијан Мицкоски, има доверба од 6 отсто, односно 2 проценти помалку од лани, а намалена е и популарноста на претседателот Стево Пендаровски за кого се определиле 3 отсто од анкетираните, еден процент помалку од лани. Поранешниот премиер Зоран Заев има драстичен пад на популарност и сега за него се определиле само 2 отсто од анкетираните, за разлика од минатата година кога имаше 9 отсто од гласовите на анкетираните. Поранешниот претседател Бранко Црвенковски, пак, ја зголемил популарноста за еден процент.

Зијадин Села има непромената популарност од 2 проценти, а Билал Касами паднал од 4 на 3 проценти.

Анкетата покажува и дека во случај утре да се одржат предвремени парламентарни избори 19 отсто од граѓаните би гласале за ВМРО-ДПМНЕ, за СДСМ би гласале 11 отсто од македонските граѓани, околу 7 отсто својот глас би го дале за ДУИ, а 6 отсто за политичката партија Левица. Во споредба со податоците од ланската анкета, рејтингот на владејачката СДСМ паднал за 5 отсто, а на ВМРО-ДПМНЕ за само 1 отсто. Рејтингот на ДУИ останал ист, додека на Левица се зголемил за 2 отсто.

Анкетиран е национално репрезентативен примерокот од 1.207 испитаници на возраст од 18 години и повеќе. Анкетата е спроведена во име на Центарот за анкетни истражувања од Брима, фирма за истражување на пазарот (членка на Тејлор Нелсон Софрес и Галуп Интернешнл). Податоците се собрани од 23 септември до 13 октомври, 2022, со повеќестепен стратификуван примерок преку интервјуа лице-во-лице во домовите на испитаниците. Податоците се пондерирани според возраст, пол, регион, населеното место (урбано/рурално) и етничката припадност. Маргината на грешка е +/- 2,8 поени на ниво на доверба од 95%, а стапката на одговор е 69%.