Во Културно-социјалниот простор „Центар-Јадро“ на 21 април, во 19:30 часот, ќе се одржи авторска вечер со Борис Постников, еден од најпознатите хрватски книжевници, колумнисти и критичари од средната генерација.

Борис Постников престојува во Скопје во текот на април, во рамките на книжевните резиденции во организација на издавачката куќа „Готен“, поддржана од европската мрежа за превод и книги „Традуки“.

Во текот на Саемот на книга, Борис Постников ќе има серија средби со македонски издавачи, критичари, писатели и читатели.

Во текот на резиденцијалниот престој, д-р Борис Постников одржа и предавање на тема „Книжевна република Југославија“ на Филолошкиот факултет „Блаже Конески“ при УКИМ во рамките на јубилејот 80 години од основањето на Филолошкиот факултет, како и јубилејот 45 години од основањето на Катедрата за општа и компаративна книжевност.

Во предавањето Постников го претстави концептот на „книжевна република Југославија“, конструиран по примерот на синтагмата „светска книжевна република“ на теоретичарката Паскал Казанова, како теоретска и методолошка рамка за опишување на споделената книжевна сцена во поранешниот југословенски простор.

Борис Постников (роден 1979 година, Сплит) работи за неделникот „Новости“, каде што претходно бил заменик-главен уредник. Го основал и уредувал месечниот додаток „Културне новости“, посветен на културата на постјугословенскиот регион, а моментално ја пишува колумната „Непријателска пропаганда“.

Тој е член на редакцискиот одбор на „Критика-ХДП“, портал за литературна критика на Хрватското друштво на писатели. Порано бил главен уредник на културниот двонеделник „Зарез“ и уредник на програмата „Речник на постјугословенската литература“ на Третата програма на Хрватското радио. Работел и како копирајтер во рекламна агенција, но и во Министерството за култура на Република Хрватска, каде што се фокусирал на медиумската политика.

Неговите есеи, коментари и рецензии се објавени во бројни хрватски и меѓународни медиуми. Тој живее во Загреб, а претходно периоди од својот живот ги поминал во Сараево, Сплит, Нови Сад и Дрвеник во близина на Макарска.