Додека некои места ќе се потрудат да привлечат посетители, жителите на населбата Ла Салут во Барселона го слават потегот дека една автобуска линија е избришана од „Гугл мапс“, пишува „Гардијан“.

Со години, жителите се жалеле дека не можат да стигнат дома бидејќи автобусот со број 116 секогаш бил преполн со туристи кои го посетуваа паркот Гуел на Антони Гауди. Паркот е втората најпопуларна атракција во градот по базиликата Саграда Фамилија.

Сега тие го имаат автобусот за себе, откако градскиот совет договорил трасата да биде отстранета од „Гугл мапс“.

„На почетокот се смеевме на идејата“, изјавил Цезар Санчез, локален активист. „Но, ние сме изненадени што мерката беше толку ефикасна“.

Луз Лопез (75) изјавил: „Порано автобусот беше толку полн дури и луѓето со бастун не можеа да се качат“.

Алберт Батл, заменик-градоначалникот за безбедност и соживот во градскиот совет, изјавил дека покрај подобрувањето на мобилноста околу паркот Гуел, „требаше да ги елиминираме референците за 116 на интернет“.

Батл одбил да признае или негира дека советот побарал да се отстрани рутата, додека портпаролот на „Гугл“ само изјавил дека тие не би избришале автобуска линија освен ако тоа не го побара советот.

Санчез, кој осум години води кампања за советот да го реши проблемот, се пошегува: „Следно што треба да направиме е да ја отстраниме целата Парк Гуел од Гугл мапс“.