Возачите што патуваат во Европската Унија и минуваат низ Австрија наскоро ќе бидат пречекани со класична леплива вињета. Австрискиот орган за автопатишта Асфинаг објави дека последен пат вињетата за автопатишта ќе се продава во форма на налепница во 2026 година.

– Од 2027 година, ќе биде достапна само дигиталната верзија – нагласи директорот на Асфинаг, Херберт Касер.

Со овој потег, Австрија го следи примерот на соседните земји како што се Словенија, Словачка, Чешка и Унгарија, кои веќе користат исклучиво дигитални системи за наплата на патарина.

Според податоците на Асфинаг, три четвртини од возачите веќе користат дигитална вињета, каде што регистарскиот број на возилото се внесува само преку интернет. Иако купувањето е можно во онлајн продавницата за патарина, вињетата сè уште може да се купи на класичен начин – на бензински пумпи или во автомобилски клубови.

Последната аналогна вињета за 2026 година ќе биде во „огнено црвена“ боја, а во исто време ќе биде и поскапа. Цените се прилагодени на индексот на потрошувачки цени и растат во просек за 2,9 проценти.

Новиот ценовник за автомобили од 2026 година е 106,80 евра за годишната вињета, двомесечна вињета ќе чини 32 евра, десетдневна вињета 12,80 евра, а еднодневна вињета ќе чини 9,60 евра. За потсетување, во 2025 година, годишната вињета за прв пат ја надмина границата од 100 евра, чинејќи 103,80 евра.

Интересно е што Швајцарија има фиксна цена на вињетата од 40 франци (околу 43 евра) благодарение на референдумот. Сепак, таму се продаваат само годишни вињети, а постои и дигитална верзија.