Австралиски истражувач по геномика разви нов тест за скрининг за рак кој трае неколку секунди и може да спаси илјадници животи, објавија локалните медиуми.

Стефан Мази, кој го разви DermR Patch со тим од четворица, рече дека еден ден може да биде алтернатива на биопсијата, која е најчестиот метод за дијагностицирање на рак на кожата, пренесува „Си-би-ес нуз“.

Првата технологија од ваков вид ја користи моќта на микроиглите за идентификација на канцерогените лезии. Процесот е безболен и брз.

– Микроиглите се помали од еден милиметар и продираат во кожата, собирајќи ја микро количината од ткивата – објаснил Мази.

Првите клинички испитувања се одржаа во регионот Пилбара во Западна Австралија во мај.

Иако конечните резултати сè уште се чекаат, Мази рекол дека раните резултати изгледаат ветувачки.

Второто и поголемо клиничко испитување веројатно ќе се одржи во следните шест до 12 месеци, пренесува Анадолија.