Австралија и Велика Британија по стапките на САД, дипломатски бојкот на ЗОИ во Пекинг
Велика Британија и Австралија им се приклучија на Соединетите Американски Држави во дипломатскиот бојкот на Зимските олимписки игри во Пекинг и нема да испратат ниту еден државен службеник на Игрите.
– Генерално не сум за бојкот на спортски натпреварувања, но сега нема да има наши претставници во Пекинг – изјави премиерот на Велика Британија, Борис Џонсон.
Веднаш по британскиот премиер, се огласи и премиерот на Австралија, Скот Морисон.
– Свесни сме дека постои проблем со кршењето на човековите права. Исто така постојат бројни проблеми кои предизвикуваат несогласувања помеѓу Австралија и Кина. Ние се обидовме да разговараме со кинеската влада за сите несогласувања, но тие не ја прифатија поканата за средба. Така што не е изненадување што во Пекинг нема да има државни службеници – изјави премиерот Морисон.
Причина за дипломатскиот бојкот на ЗОИ во Пекинг од страна на САД, Велика Британија и Австралија е кршењето на човековите права во малцинствата во Кина, пред се на Ујгурите.
И Јапонија и Канада најавија дека е можно да се приклучат на дипломатскиот бојкот.
Кина остро ги отфрли сите обвинувања и истакна дека дипломатскиот бојкот е всушност „политичка пропаганда“.