Авион „Бомбардие CRJ-900“ на германската авиокомпанија „Луфтханза“ на лет од Лион до Минхен беше пренасочен кон аеродромот во Женева во саботата поради технички проблем, кој беше пријавен кратко по полетувањето, објавија денес француските медиуми.

По полетувањето од аеродромот „Сент Егзипери“ во Лион, авионот на „Луфтханза“ прво кружеше над Лион, а потоа екипажот доби инструкции од контролата на летање да го пренасочи авионот кон Женева, објавува „Фигаро“, наведувајќи дека по добивањето информации за пренасочувањето на авионот, на пистата на аеродромот во Женева бил распореден тим за итни интервенции.

Патничкиот авион „Бомбардие CRJ-900“ на германската авиокомпанија бил во фаза на искачување кога екипажот регистрирал „системско предупредување“ и веднаш ја започнал постапката за итни случаи.