Арс ламина – публикации: Најпознатите монолози на Тошо Малерот се објавени во „Монологија“
Книгата „Монологија“ на Васко Тодоров, во која се собрани сите култни монолози на неговото хумористично алтер-его Тошо Малерот од легендарното шоу „К-15“, беше издадена неодамна под капата на „Арс Либрис“, дел од „Арс Ламина – публикации“.
Во книгата се собрани најпознатите монолози на Тошо Малерот, но и скечеви кои не биле емитувани на телевизија. Во промотивното видео, каде Васко Тодоров се појавува во улога на неговиот лик Тошо Малерот, се зборува и за правецот на самото дело.
– Батка, оваа книга ти е чист импресионизам со примеси на експресионизам, а целта е да се доближи човековото внатрешно битие кон возвишеното во него. Затоа што љубовниот стремеж е чекан, обостраната хемија е длето и сè се сведува на делкање – вели тој.
Васко Тодоров во моментов е дел од екипата на сатиричната емисија „Фчерашни новости“. Најголемиот дел од популацијата го препознава по легендарните ликови кои ги толкуваше во рамки на шоуто „К-15“ заедно со Бранко Огњановски и Љупчо Бубо Каров. Првата епизода била емитувана на 23 ноември 1994 година на А1 телевизија. Шоуто оттогаш обезбедува силна социјална, политичка и економска критика, особено на нелогичностите во македонското општество, етничката толеранција, стереотипите и табу-темите. „К-15“ во текот на своето постоење е емитувана на повеќе домашни телевизии и останува една од најпознатите хумористични емисии во земјава.
На 17 август, во 19 часот, во книжарницата „Литература.мк“ во „Сити мол“, Васко Тодоров ќе ја потпишува неговата книга „Тошо Малерот: Монологија“.
(Текстот е објавен во „Културен печат“ број 44, во печатеното издание на „Слободен печат“ на 15-16 август 2020)