Најдобрата македонска репрезентација утре од 18.00 часот се среќава против Ерменија во последениот натпревар во Лигата на Нациите. Нашата А селекција и со нерешен резултат обезбедува пласман во повисокиот ранг од натпреварувањето, Лигата „Б“.

Фудбалерите тренираа на „ГСП Стадиум” во Никозија (Кипар), а на официјалната прес-конференција за очекувањата зборуваше селекторот на репрезентацијата, Ангеловски.

– Секој позитивен резултат нè носи во Лигата „Б“. И во минатото сме имале проблеми со повредени и суспендирани играчи, никогаш не сум се жалел. Ќе играме со тие кои ги имаме на располагање, да го извадиме максимумот од нив и наше ќе биде да дојдеме до позитивен резултат.

Не сум селектор кој калкулира, па на нерешено и не знам да играм, тоа ми е мана, ќе играме на победа. Имаме одличен избор, тука не се да пополнат место, играме натпревар кој ни значи – вели Ангеловски.

Македонија има девет бода на првата позиција, пред Ерменија (осум), Грузија (шест) и Естонија на последното четврто место со два.