Директорот на Дирекцијата за заштита и спасување, Стојанче Ангелов, информираше дека вчера имало повеќе од 30 пожари на отворен простор, од кои најопасен сè уште останува пожарот во НП „Јасен“ и соопшти дека утринава пожарникарите загубиле контрола на дел од пожарот во Јегуновце, кој уште е активен.

„Во текот на вчерашниот ден имавме повеќе од 30 пожари на отворен простор, од нив во овој момент два се најсериозни. Најтежок пожар е оној во Јасен, но пред малку изгубивме контрола од еден крак од пожарот во Јагуновце каде што гори рид на кој се поставени репетитори кои успеавме да ги спасиме, но пожарот е сè уште активен“, соопшти Ангелов.

Тој додаде дека во гаснење на пожарот во Јегуновце делува еден полициски хеликоптер и верува дека денеска овој пожар ќе биде ставен под целосна контрола.

Исто така, од ДЗС информираа дека утрово на терен бил и премиерот Христијан Мицкоски, кој се сретнал со дел од екипажот кој го гасне пожарот во НП „Јасен“.