Пеп Гвардиола по пет години во Манчестер сити успеа да го направи за што беше ангажиран, ги однесе „граѓаните“ во финалето на Лигата на шампионите и за големиот успех добива пофалби од сите страни. Една од нив е и од поранешниот капитен на Баерн Минхен и на германската репрезентација, Филип Лам и тоа во колумна за шпанскиот весник „Ел Паис“.

Лам во колумната опиша како ја дожива работата со Пеп Гвардиола додека Каталонецот го предводеше Баерн Минхен во периодот од 2013 до 2016 година.
„Пеп Гвардиола еднаш ми рече: На големите натпревари одбирам само 11 најдобри играчи кои ги имам. Оваа реченица беше неговата девиза. Гвардиола е тренер кој го сака знаењето и талентот кај своите играчи. Некои тренери сакаат да на намалат сложеноста на фудбалот, а Гвардиола сака да доминира со сложеноста. Неговата работа може да се спореди со шаховски велемајстор или со диригент кој од секој музичар го извлекува најдоброто“, пишува Лам во колумната.

Лам воопшто не греши кога станува збор за неговото искуство бидејќи на самиот крај од својата кариера, тој во системот на Гвардиола беше многу повеќе од обичен десен бек. Кога Баерн се бранеше, Лам се повлекуваше во линија со четири одбранбени играчи во последната линија, додека во нападот тој стануваше дел од средниот ред како трет дефанзивен играч со поголема слобода со креативноста. Лам го опишува Пеп Гвардиола на начин на кој го виде додека ја водеше Барселона пред да го презеде кормилото на Баерн Минхен.

„Кога Барселона триумфира во Лигата на шампионите во 2009 и 2011 година, тие ги давеа своите противници. Овој стил беше можен бидејќи сите во Барселона беа верни на идејата на тотален фудбал на Јохан Кројф. Доколку можеше да клонира, Гвардиола на терен ќе го имаше Андрес Иниеста клониран 11 пати. Но, на другите места на кои работеше мораше да ги жртвува своите идеи. Неговиот Манчестер сити сега игра повнимателно, тој се преориентира на атлетска одбрана која доминира во воздушните дуели. Екипата понекогаш ја остава, ја дава топката и се враќа назад, се бори во својата половина и затоа е потребно време да се постави контранапад“, пишува Лам.

Поранешниот германски репрезентативец тврди дека сите фудбалери го сакаат Пеп Гвардиола.
„Гвардиола научи да ги почитува едноставните голови. Од корнер или од шут надвор од шеснаесетникот, тој разбира дека и овие голови влегуваат во статистиката. Тој не е слеп следбеник на тика-така стилот. Тоа што го сака Гвардиола е да ги развие способностите и квалитетите на своите играчи. Тој им оддава почит со тоа што неговите омилени системи на игра 4-3-3 и 3-5-2 не ги става над своите играчи. Тој е нивен пријател, постојано е тука за нив и затоа сите го сакаат Гвардиола“, завршува Филип Лам.