Американскиот претседател Доналд Трамп вчера се закани дека би вовел царини за земјите кои не го поддржуваат неговиот план САД да ја преземат контролата врз Гренланд, наведувајќи дека тоа е прашање на национална и светска безбедност.

„Можам да воведам царини на земјите ако не се согласат со Гренланд, бидејќи ни е потребен Гренланд за национална безбедност“, рече Трамп на тркалезна маса во Белата куќа за руралното здравство.

Во објава на својата социјална мрежа „Truth“, претседателот додаде дека Данска, како и други земји од Европа, „ги штителе“ територијалните интереси на Гренланд без да наплаќаат компензација, додека Кина и Русија, според него, се заинтересирани за островот.

Политико: Европа тивко се подготвува за одговор ако Трамп тргне по Гренланд

Како мерка, од 1 февруари 2026 година, Трамп најави воведување царини од 10 проценти за стоките од Данска, Норвешка, Шведска, Франција, Германија, Обединетото Кралство, Холандија и Финска што се испорачуваат во САД. Царината ќе се зголеми на 25 проценти од 1 јуни 2026 година, сè додека не се постигне договор за целосно купување на Гренланд.

Трамп истакна дека САД повеќе од 150 години се обидуваат „да го купат“ островот и дека со модерните системи за одбрана и „Златната купола“, контрола врз Гренланд е критична за националната безбедност и заштита на глобалниот мир.

Претседателот ги повика Данска и другите земји вклучени во ова прашање на преговори, нагласувајќи дека со текот на децениите САД обезбедиле максимална заштита и поддршка за регионот.