Ракометарите на Алкалоид продолжија со одличните настапи и ја потврдија доминацијата против Бутел Скопје, откако славеа на гостински терен со 28-33 (12-18) во рамки на 18. коло од Суперлигата.

Екипата предводена од Кирил Лазаров од самиот почеток наметна силно темпо и рано стави до знаење во чија насока ќе оди натпреварот. Алкалоид отвори со серија од 0-4 преку Костески, Митев и Велковски, а во текот на првото полувреме константно ја одржуваше предноста од околу четири погодоци. Во завршницата од првиот дел разликата дополнително порасна, па на пауза се замина со убедливи 12-18.

Во второто полувреме Бутел влезе поагресивно и успеа да намали на 16-20, но Алкалоид брзо ја врати контролата врз играта. По водството од 19-25, домашниот тим направи серија од 3-0 и повторно се доближи, но тоа беше максимумот што можеше да го извлече. Иако Бутел во финишот успеа да се спушти на минус три, гостите мирно го приведоа мечот кон крај и заслужено стигнаа до победата.

Најефикасен на натпреварот беше Никола Костески со осум погодоци, додека кај Бутел најмногу се истакна Димитар Узунчев со седум гола.